فيه فكره شائعة وغلط . انه الريد بتاع السرفرات فقط . الحقيقة لا ممكن حضرتك تعمل نوع من انواع Raid فى جهازك عادى. لأن معظم البورد الحديثة Mother Board فيها الخاصية دى
الأول هو ايه الريد ؟
قبل ما نتكلم عن انواع Raid .وبعيد عن اى مصطلحات معقده .لو أنا عندي هاردين كل هارد 1 تيرا . وعايز اخلي ال 2 كأنهم هارد واحد . أو عندي 4 هاردات عايز أتعامل معاهم كأنهم هارد واحد . ده الريد
طب ده ها يفيدني بأيه ؟
ها تستفيد حاجه من تلاته . تستفيد بالمساحة أو تستفيد بالسرعة أو تستفيد بالأمان
طب ازاى ؟
عشان نعرف ازاى . لازم نعرف انواع Raid الأول . انواع Raid من أول 0 لحد 10 .
ها نتكلم عن 3 بس من انواع Raid هما 0 و 1 و 10
تعالى ناخد مثال نشتغل عليه
انا اشتريت هاردين كل هارد 1 تيرا . وعايز اعملهم ريد (يفضل في الريد انه يبقى الهاردات تبقى زى بعض نوع ومساحه). قدامى طريق من 2
1- انه ادمج الهاردين مع بعض فيبقوا 2 تيرا
– ها تقولي وريد ليه وصداع . ما أنا لما ها أوصلهم بالكمبيوتر ها يبقوا 2 تيرا . إيه الفايده ؟
الفايده إنهم وهما فى ريد لما يبقو 2 تيرا ها . تاخد ضعف السرعة .هتاخد سرعه الهاردين مره واحده في القرايه والكتابة . النوع ده اسمه من انواع Raid ريد 0 . فلو تهمك السرعة يبقى ده تمام . كالعاب أو برامج جرافيك وتصميمات . الخ
بس فيه عيب . لو هارد من ال 2 باظ . يبقى الداتا مش موجودة . لا عالهارد السليم ولا اللى باظ بالتأكيد

2- الطريق التاني من انواع Raid
ان الهاردين بتوعى .واللى كل هارد منهم 1 تيرا اشغلهم كأنهم 1 تيرا بس . ويبقى واحد نسخه بالكربون من واحد .الفايدة هنا الأمان . فلو واحد باظ فالداتا بتفضل موجودة على التانى . النوع ده من انواع Raid اسمه ريد 1
باختصار كده عشان تختار نوع من انواع Raid. عايز سرعه اختار 0 عايز أمان اختار 1
طب مش ينفع الميزتين في نفس الوقت ؟
ينفع بس لازم يبقوا 4 هاردات على الأقل
ازاى ؟
نجيب 4 هاردات كل واحد منهم 1 تيرا . ينفع تاخد الميزتين بأنك تشغل ال 4 تيرا كمساحه تخزينية 2 تيرا
ازاى برصه ؟
ها توصل كل 2 ببعض ك ريد 1 . يبقى كل هاردين كده ها يدو 1 تيرا . لان واحد نسخه بالكربون من التانى زى ما قلنا. كده ها يبقى المجمل عندي من 2 تيرا . الآن عندي فرقتين كل فرقه فيها هاردين متوصلين ريد 1 . أوصل بقى الفرقتين ببعض ب ريد 0 كده ابقي اخدت السرعة . واخدت الأمان . النوع ده بقى من انواع Raid اسمه ريد 10

طيب هو اعمل نوع من انواع Raid يبقى جوا الجهاز ؟
لا مش لازم فيه ستورج بتباع بتتحط فيها الهاردات ك ريد .أو بتباع بهارداتها جاهزة . وتوصلها بالكمبيوتر usb او عن طريق الشبكة Lan
ممكن تعرف اكتر عن نظم الريد من هنا
ولو نظام RAID عندك اتعطل أو فقدت ملفات منه، متجربش إعادة بناء عشوائية أو تغيير ترتيب الأقراص؛ اسأل عن استعادة بيانات RAID واحتفظ بترتيب الأقراص وأي رسائل خطأ ظهرت.
لو الريد عليه شغل فريق أو بيانات عملاء، فقرار إعداده مش مجرد جمع مساحات. خُد وقتك لفهم الاختيار والاحتفاظ بنسخة من البيانات المهمة قبل أي تغيير. ولو مجموعة أقراص اتعطلت، وصف اللي حصل أهم من استعجال تجربة إعداد مختلف على نفس الملفات.



