اختيار نوع فورمات الهارد ديسك أو الفلاش أو الميموري

فورمات الهارد ديسك أو الفلاش

لما تشترى أي وسيط تخزين  جديد مثلا الهارد ديسك. أو الفلاش أو هارد محمول . USB  أو حتى كارت الميموري للكاميرا أو التلفون بنتلخبط نختار نوع فورمات الهارد ديسك أو الفلاش إيه  ؟  نختار إيه من الأنواع  اللي بنشوقها  NTFS  ولا FAT32  ولا exFAT  وعلى فكره ال 3 بتوع Microsoft

أولا كل حاجه   لها  التهيئة او ال فورمات الهارد ديسك أو الفلاش الأنسب.  وده على حسب استخدام حضرتك . وذي ما ها نوضح  وعلى حسب نوعها . لأن الفلاش غير الهارد غير ال ميمورى

يعنى إيه  تهيئه  الهارد ديسك  أو الفلاش  ( فورمات ) ؟

ببساطه لو عندك قطعه ارض وعايز تبنيها . المفروض على حسب الاستخدام ها تقرر التخطيط وعدد الغرف .

لو حضرتك ها تعملها بيت غير ما تعملها عماره غير ما تعملها فندق . على حسب الاستخدام ها تقرر  تعمل غرف قد ايه  . لو فندق ها تعمل اكتر وهكذا  .

الغرف بقى عندنا  فى التقسيم  format  اسمها كلستر Cluster   . على حسب الملفات اللي ها تحطها في الغرف اللي هيه ال  Cluster  المفروض ها تقرر نوع التهيئة او ال  فورمات  . وكمان على حسب نظام التشغيل الموجود على الجهاز اللي أنت ها تشغل الفلاش أو الهارد أو الكارت بتاعك عليه .

ويندوز ولا ماك ولا لينكس ولا منصة العاب زى اكس بوكس والخ


أولا فورمات الهارد ديسك أو الفلاش

FAT32

حجم الكستر فيه يساوى 16  كيلو بايت . كان مفضل لنظم الويندوذ القديمة . وما زال المفضل بالنسبة للفلاشات . حتى ها تلاقى لما تيجى تعمل فورمات  فلاش  مكتوب جنب Fat32  انه default  

عيوبه

1 – عيبه الكبير جدا انه لا يدعم الملفات اكبر من 4 جيجا . يعنى ما تقدرش تحط ملف فيلم  مثلا  حجمها اكبر من 4 جيجا . أو ملف  ISO  اكبر من 4 جيجا على بارتشن  متقسم بالنظام ده Fat32

2 – بيهدر فى المساحة . لأنه حجم الكلستر فيه كبير 16  كيلو . يعنى لو كتبنا ملف مثلا 20 كيلو ها يشتغل كلستر وربع . طب ما ينفعش نكتب فالكلستر التانى اللي فاضي فيه ثلاثة أرباعه ده  ملف جديد ؟ لا ده خلاص كده . المساحة دى ضايعه

3- لا يدعم البرتشنات الكبيرة فوق 32 جيجا . عشان كده لو فيه برتشن 100 جيجا مش ها تلاقى اختيار fat . فقط ها تلاقى الويندوز بيديك فورمات الهارد ديسك أو الفلاش NTFS

مميزاته

انه كل نظم التشغيل تقريبا بتتعامل معاه قراءه وكتابه .  الويندوز بيعرف يتعامل معاه والماك Mac اللى هو نظام تشغيل Apple  بيعرف يتعامل معاه  وال Linux بيعرف يتعامل معاه  . وأجهزه الألعاب . من الأخر هو ال Universal


ثانيا فورمات الهارد ديسك أو الفلاش

NTFS

حجم الكستر فيه يساوى 4   كيلو بايت . يعنى مش ها نهدر فى الملفات زى الفات FAT32 . ويدعم الملفات الكبيرة  فوق ال 4 جيجا  والهاردات اللي إحجامها كبيره  . وهو المفضل لتقسيم الهاردات عشان كده ها تلاقى لما تيجى تعمل فورمات الهارد ديسك أو الفلاش  ديسك ها تلاقيه مختاره  default  . وهو الفضل انه ينزل عليه نظام تشغيل  ويندوز والخ . النظام ده اتطور بقى لنظام جديد اسمه  REFS

مميزاته

  1. مجموعه من مزايا الامان
  2. حجم الملفات الكبير
  3. التعامل مع الهاردات اللى مساحتها كبيره

عيوبه

انه مش مدعوم من كل نظم التشغيل . الماك Mac اللى هو نظام تشغيل Apple بيقرا منه بس لكن ما بيكتبش عليه غير بطرق خاصة  . نسخ قليله جدا من ال Linux اللى بتقدر تتعامل معها ككتابه ايضا


ثالثا  فورمات الهارد ديسك أو الفلاش 

exFAT

ده بقى لما ميكروسوفت ضربت ده بقى لما ميكروسوفت ضربت FAT32  و NTFS  فى الخلاط عملت نظام له مزايا الفاتFat32  بس يشيل ملفات كبيره . ويفضل جدا في الميموري اللي حجمه كبير 64 جيجا فأكثر  . وبالأخص لكاميرات التصوير . مدعوم بقى كليا قراءه وكتابه  من  ال Mac   و  Android  و  Windows

وبعض ال Linux مش كله

مميزاته

  1. يدعم الملفات الكبيرة
  2. مدعوم من معظم نظم التشغيل كليا

عيوبه

ميكروسوفت عامله ليه  license فالشركات مقلله في استخدامه حتى الآن


الخلاصة

1- الهارد ديسك يفضل يتقسم NTFS  لو ها تشيل نظام تشغيل زى ويندوذ .

ولو هارد ديسك . USB  يفضل يبقى كذلك. ده  لو مش ها يركب على ماك . او ها يركب على ماك تقرا منه بس ماتحطش ملفات من الماك عليه

2- كروت الكاميرات يفضل exFAT   ولكن للكروت الميمورى الكبيرة السعه

3- الفلاشات لو ملفات عاديه سيبها fat32 . ولكن لو ها تحط عليها ملفات اكبر من 4 جيجا يفضل تعملها NTFS


س : أنا بحاول اقسم الفلاش NTFS  بس مش لاقى الاوبشن ده موجود فالاختيارات زى كده.  بلاقى فات fat32  واكس فات بس  ?

ج . عشان يظهر لبعض أنواع  الويندوذ انك تقسم الفلاش NTFS  اعملها  better performance

زى ما فى الصور

لمعرفه المزيد عن NTFS اقرا الموضوع

من هنا

تابع صفحتا على الفيس بوك

من هنا